Lögreglustjórinn á Norðurlandi eystra birti í morgun ákærur yfir tveimur mönnum sem ákærðir eru fyrir brot á tollalögum. Mun annar maðurinn hafa ætlað sér að smygla tveimur kartonum af Chesterfield sígarettum og tveimur kílóum af reyktu svínakjöti til landsins með flugi Wizz Air frá Vilníus í Litháen í maí árið 2019.

Hinn maðurinn virðist af ákærunni að dæma öllu stórtækari í smygli sínu, en hann mun hafa verið stöðvar með eitt karton af Winston Blue sígarettum, annað af Chesterfield Blue, 225 grömm af L D Extro Volume reyktóbaki og heil sex kíló af hráu svínakjöti. Sá var á leið til landsins frá Osló í Noregi.

Saksóknarinn hefur þurft að kafa djúpt ofan í lögfræðiskruddurnar sínar við undirbúning málsins, því brotin sem mennirnir eru undir grun um að hafa framið eru talin varða við, hvorki meira né minna en, 1. mgr. 170. gr., sbr. 6. gr. og 3. mgr. 27. gr. tollalaga nr. 88/2005, sbr. 2. gr. reglugerðar nr. 630/2008 um ýmis tollfríðindi og f-lið 1. mgr. 10. gr., sbr. áður a-lið sama ákvæðis, sbr. 30. gr. laga nr. 25/1993 um dýrasjúkdóma og varnir gegn þeim, að því er segir í ákærunni.

Þar sem lögreglan á Norðurlandi eystra hefur ekki tekist að birta mönnunum sjálfum ákærurnar eru þær birtar í dag í lögbirtingablaðinu. Þar eru mennirnir hvattir til þess að mæta þann 10. mars í Héraðsdóm Norðurlands eystra á Akureyri og taka afstöðu til málsins.

Þá er þess krafist í málinu að gerðar verðar upptækar áðurnefndar sígarettur, reyktóbak og öll átta kílóin af svínakjöti. Afar ólíklegt þykir að svínakjötið sé enn til, en gera má ráð fyrir því að það hafi verið gert upptækt við komu mannanna til landsins árið 2019. Í því ljósi getur það ekki talist eftirsóknarvert að vera úrskurðaður umsjónarmaður þess kjöts.