Ljósi punkturinn í þessu öllu er að unnustan sagði já en hún hafði varla sleppt orðinu þegar hún rann í snjónum á toppi fjallsins og í átt að brúninni. Unnustinn reyndi auðvitað að koma henni til aðstoðar en það var til lítils því hann rann sömu leið og hún og bæði fóru þau fram af brúninni.
Kronen Zeitung, Bild og fleiri fjölmiðlar skýra frá þessu. Fram kemur að þau hafi bæði hrapað 15 metra áður en þau lentu. Þar náði maðurinn taki á kletti og ríghélt sér í hann. En konan var ekki svo heppin og rann tæplega 200 metra niður eftir snævi þaktri hlíðinni. Hún staðnæmdist að lokum við vatn og var þá nærri meðvitundarlaus.
Björgunarsveitir voru að sjálfsögðu kallaðar út til aðstoðar. Lögreglumaður, sem stýrði aðgerðum á vettvangi, sagði að hin verðandi hjón hafi verið mjög heppin. Bæði hafi þau hrapað 15 metra í frjálsu falli, ef ekki hefði verið svona mikill snjór hefði þetta líklega farið mjög illa.
Það var fjallgöngumaður sem fann konuna og kallaði eftir aðstoð. Þyrla var send á vettvang og voru hin verðandi hjón flutt á sjúkrahús. Þau sluppu ótrúlega vel frá þessu og meiðsli þeirra teljast minni háttar.
