Valgarð Heiðar Kjartansson, faðir Ævars Annels Valgarðssonar sem lögreglan lýsti eftir fyrir helgi, tjáði sig stuttlega um mál sonar síns við DV í dag.

„Í veit allavega að það er í lagi með með hann,“ segir Valgarð en ekki kom fram í samtalinu hvort Valgarð vissi um verustað sonar síns.

Margir óttuðust um afdrif Ævars, sem er tvítugur að aldri, í kjölfar þess að lögregla lýsti eftir honum. Hann tengist máli MMA bardagakappa sem birt hefur ofbeldismyndbönd af sér undanfarnar vikur. Í fyrsta myndbandinu, sem vefur Mannlífs birti, var Ævar þolandi bardagakappans, samkvæmt því sem Valgarð segir. Valgarð segir hins vegar að Ævar sé ekki í öðrum myndböndum sem birst hafa í fjölmiðlum undanfarið og tengjast bardagakappanum.

Á þriðjudagskvöld varð eldsvoði í íbúð í fjölbýlishúsi við Friggjarbrunn í Úlfarsárdal. Þar mun umræddur bardagakappi hafa búið en íbúðin var mannlaus þetta kvöld. Sólarhring síðar fór í umferð myndband sem sýnir mann kasta bensínsprengju inn um glugga íbúðarinnar. Nokkru síðar birtu fjölmiðlar myndband af viðlíka árás á hús á Freyjugötu, sem á að hafa verið gerð í hefndarskyni.

Bardagakappinn birti ennfremur myndband af sér þar sem hann hótar manni lífláti og mundar haglabyssu. Ennfremur birti hann annað myndband af sér þar sem hann misþyrmir manni.

Valgarð segir að sonur sinn, Ævar, hafi ekki komið nálægt íkveikju að Friggjarbrunni, hann sé ekki maðurinn sem kasti bensínsprengju inn um glugga í myndbandinu. „Hann kom ekkert nálægt þessu. Hann er með fjarvistarsönnun.“ Bardagakappinn virðist hins vegar telja að Ævar eigi hlut að máli.

Margnefndur bardagakappi var úrskurðaður í tveggja vikna gæsluvarðhald á föstudaginn.