„Áhorfendur munu hvorki sjá né finna fyrir þessari vörn okkar og grípum við einungis til þessara upplýsinga ef við sjáum þáttinn dúkka upp á þekktum, ólöglegum niðurhalssíðum,“ segir Magnús Ragnarsson, framkvæmdastjóri afþreyingamiðla og sölu Símans, í samtali við Nútímann.

Þar er greint frá því að Síminn hafi hannað þjófavörn sem á að geta rakið það hver deilir þáttunum á vinsælum skráarskiptasíðum á netinu, komi til þess. Mjög algengt er að íslenskir, jafnt sem erlendir sjónvarpsþættir, dúkki upp á torrent-síðum á netinu.

Að því er fram kemur í frétt Nútímans er um íslenska hönnun að ræða en með vörninni er hægt að rekja hvaðan þátturinn kom, hvaða áskrifandi setti þáttinn á netið.

Magnús segir að þættirnir um Stellu sé ein stærsta framleiðslan á innlendum sjónvarpsmarkaði, en alls verður um sex þætti að ræða. „Við grípum því til þess ráðs að verjast ólöglegri dreifingu með þessum hætti því mikilvægt er að verja þessa stóru fjárfestingu svo við getum áfram tekið þátt í að framleiða vandað íslenskt efni á sanngjörnu verði fyrir viðskiptavini okkar,“ segir Magnús.

Á vef Símans um þættina segir: „Þættirnir um Stellu Blómkvist eru byggðir á bókunum um lögfræðinginn sem enginn veit hver skrifaði. Þættirnir eru sex talsins og segja þrjár ólíkar sögur af lögfræðingnum, sem glímir við glæpaheiminn – sem teygir anga sína alla leið inn í stjórnarráðið.

Þættirnir um lögfræðinginn Stellu Blómkvist bera hæst í dagskrá Símans í vetur en Síminn hefur í samstarfi við Sagafilm framleitt þættina til alþjóðlegrar dreifingar. Þeir verða aðgengilegir í Sjónvarpi Símans frá 24. nóvember og í opinni dagskrá Sjónvarps Símans síðar í vetur.“