Kraftajötuninn Eddie Hall tók sig til og gerði 100 uppsetur á dag í heilan mánuð. Hann sýnir frá öllu ferlinu í myndbandi fyrir YouTube-síðu sína.
Eddie Hall mun mæta Hafþóri Júlíus í boxhringnum í september á næsta ári. Þeir tveir eiga langa sögu að baki, þeir hafa keppt á móti hvor öðrum í Sterkasti maður í heimi. Hafþór sakaði Eddie um svindl árið 2017 þegar sá síðarnefndi bar sigur úr býtum. Í byrjun maí bætti Hafþór met Eddie í réttstöðulyftu og tók af honum heimsmetið.
Eddie stendur nú í ströngu við að æfa fyrir bardagann. Þessa dagana er hann að leggja meiri áherslu á að léttast í stað þess að byggja upp vöðva.
„Ég ætla að léttast og koma mér í form,“ segir Eddie í myndbandi á YouTube-síðu sinni.
„Ég ætla að reyna að gera 100 uppsetur. Ég held að ég nái því ekki en þetta tekur tíma. En ég ætla að reyna að gera 100 uppsetur á hverjum degi, smá box æfingar og svo ætla ég að fara út að hjóla og byrja að léttast.“
Áskorunin hefur greinilega borgað sig þar sem í lokin má sjá greinilega kviðvöðva hans. Hann var 175 kíló í byrjun en missti um átta kíló. Það er þó ekki aðeins kviðæfingunum að þakka, heldur borðaði hann minna og gerði fleiri þolæfingar.
„Eins og þið vitið þá ætla ég í hringinn með Hafþóri. Ég held að ég sé ekki að fara í hringinn 160 plús kíló. Það væri frekar kjánalegt. Ég held að ég og Hafþór þurfum báðir að léttast svo við getum báðir haldið út þriggja mínútna lotu og gefið íþróttinni þá virðingu sem hún á skilið.“
