Dómur verður kveðinn upp í máli fyrrverandi forstjóra Pharmaco, Sindra Sindrasonar, í Héraðsdómi Reykjaness, þann 29. apríl næstkomandi. Sindri er ákærður fyrir skattsvik og peningaþvætti.
Í ákærunni er Sindri sakaður um að hafa brotið lög með því að hafa staðið skil á efnislega röngum skattframtölum gjaldárin 2011 til og með 2015 með því að láta undir höfuð leggjast að telja fram á skattframtölum sínum tekjur að fjárhæð tæplega 122 milljón krónur frá félögunum Larsen Danish Seafood A/S og Larsen Danish Seafood GmbH. Meintur vangreiddur tekjuskattur nemur tæplega 66 milljónum króna.
Sindri er forstjóri tæknifyrirtækisins Carbon Recycling International en áður var hann hluthafi og stjórnarmaður í Actavis. Hefur hann komist á lista yfir tekjuhæstu stjórnendur fyrirtækja.
Sindri hefur víða komið við í íslensku viðskiptalífi en hann var forstjóri Pharmaco í 22 ár. Auk þess sat hann í stjórn Eimskipafélags Íslands. Sindri var stjórnarmaður Larsen Danish Seafood á árunum 2003 til 2014.
