Það vakti verulega athygli þegar Real Madrid ákvað að semja við bakvörðinn Julian Faubert á láni árið 2009.

Faubert var þá á mála hjá West Ham á Englandi en Real reyndi óvænt við hann á lokadegi janúargluggans.

Faubert hefur nú opnað sig um hvernig þetta gekk fyrir sig en hann slökkti fyrst á símanum er spænska liðið hafði samband.

,,Við vorum í liðsrútunni á leið á Upton Park að spila gegn Fulham. Ég fékk símtal frá þessum Frakka hjá Real Madrid. Hann heilsaði og sagðist þurfa að tala við mig,“ sagði Faubert.

,,Ég sagði honum að ég væri að undirbúa mig fyrir mikilvægan leik og að ég hefði ekki tíma fyrir þetta kjaftæði.“

,,Ég slökkti á símanum, spilaði leikinn og eftir hann kveikti ég aftur. Ég sá svo um 30 skilaboð og 50 í talhólfinu. Þá vissi ég að þetta væri alvarlegt.“

,,Ég hringdi í stjórann minn og hann sagði að við þyrftum að ræða við Real Madrid því að þeir væru á hóteli í Heathrow. Þetta var á lokadegi gluggans og við fórum þangað og ræddum málin.“