Hjá Amazon geta sjálfstæðir aðilar selt vörur sínar á markaðstorginu en nú hefur Amazon sett þeim gráðugustu stólinn fyrir dyrnar og þvingar þá til að lækka verð á andlitsgrímum og öðrum hlífðarbúnaði sem er talinn gagnast gegn veirunni. Einnig hefur verið lokað á sölu sumra söluaðila og vörur þeirra fjarlægðar af vef Amazon.
Der Spiegel skýrir frá þessu og vitnar í Wired. Fram kemur að margir seljendur hafi séð sér leik á borði að undanförnu að hækka verðið á vörum sem eru taldar geta veitt vernd gegn veirunni. Amazon hefur sent mörgum þeirra viðvörun og bent þeim á að verðlagningin sé ekki í samræmi við stefnu Amazon um sanngjarna verðlagningu. Samkvæmt reglunum mega verðin ekki vera hærri en þau verð sem voru í boði fyrir skömmu og skiptir þá engu hvort varan var til sölu á vef Amazon eða annarsstaðar.
Sem dæmi má nefna þær andlitsgrímur sem seljast best á vef Amazon í Bandaríkjunum eru nú verðlagðar á 15 dollar, 100 grímur í pakka, og er verðið nú fjórum sinnum hærra en fyrir nokkrum vikum. Dæmi eru um að verð á dýrari og betri grímum hafi allt að fimmfaldast.
