Jón Trausti Reynisson, ritstjóri Stundarinnar, greinir frá því í pistli í nýjasta tölublaði blaðsins að Jón Gnarr, skemmtikraftur og fyrrverandi borgarstjóri, hafi blokkað sig á Twitter. Jón Trausti segir að hann hafi aldrei áður upplifað að vera blokkaður á samfélagsmiðli og hafi honum þótt þetta óþægileg tilfinning.
„Fyrsta tilfinningin sem ég fékk var undrun. Því næst leið mér ósjálfkrafa eins og það væri verið að útiloka mig. Ég upplifði skömm. Það rifjaðist upp gömul, sár minning úr bernsku þegar krakkarnir skilja mann útundan. En svo skildi ég að þetta snerist ekki um mína bresti,“ segir Jón Trausti í pistli sínum.
Jón Trausti rifjar upp að Snæbjörn Brynjarsson, varaþingmaður Pírata, hafi verið blokkeraður af Bjarna Benediktssyni á Twiterr. „Mér fannst ólýðræðislegt af forsætisráðherra að blokkera hann. En Trump Bandaríkjaforseti gerir þetta líka. Hann blokkeraði fyrirsætu í sumar af því að hún sagði að engum líkaði við hann. Sá sem blokkeraði mig er málsmetandi maður og hefur þótt frumkvöðull í stjórnmálum á Íslandi. Nýi tíminn, ekki þetta gamla,“ segir Jón Trausti.
Jón Trausti telur að Jón Gnarr hafi blokkað sig vegna umfjöllunar Stundarinnar um viðtal sem birtist í Fréttablaðinu þegar bók hans, Útlaginn, kom út. Þar lýsti Jón grófu ofbeldi af höndum bæði nemenda og kennara sem á að hafa átt sér stað við heimavistarskólann Núp. Enginn samnemenda hans kannaðist við það.
„Margar jákvæðar greinar hafa verið birtar um hann. Þegar hann ákvað að bjóða sig ekki fram til forseta birtum við á Stundinni viðtal við hann þar sem hann útskýrði ástæður sínar og aðrar fyrirætlanir. Hann sagðist frekar vilja breyta sjónvarpsdagskránni en heiminum. Og nú er hann búinn að breyta heiminum sínum. Útrýma mér og fleirum úr honum fyrir tengsl við gagnrýni,“ skrifar Jón Trausti.
Jón Trausti vísar í orð Jóns Gnarrs um „freka karlinn“ sem þoldi ekki gagnrýni. „Í hans augum eru allir, sem eru ekki sammála honum fífl og fávitar. Og konur eru annað hvort stelpur eða kellingar. Hann sýnir vandlætingu sína með svipbrigðum og orðum. Hann er alltaf í fullum rétti, veit allt betur en allir aðrir og hefur alltaf rétt fyrir sér. Hann fær aldrei nóg, ekki einu sinni af sjálfum sér,” sagði Jón í þeim pistil.
Jón Trausti segir að Jón Gnarr sé nú orðinn sjálfur þessi freki maður: „Ég man að hugsaði að hann gæti orðið góður forseti, með engan valdhroka og þroskað og nútímalegt viðhorf til samfélags og lýðræðis. En núna er ég feginn og þakklátur honum. Feginn að hann varð ekki forseti Íslands. Feginn að hann upplýsti mig svona. Feginn að hann sá sjálfur að hann ætti að hætta í stjórnmálum, áður en hann byrjaði að blokkera fólk og fjölmiðla, eins og Trump og Bjarni Ben. Áður en hann varð freki karlinn.“
