Á fimmtudaginn var maðurinn handtekinn og játaði hann við yfirheyrslur að hafa myrt eiginkonu sína. Bild skýrir frá. Hann sagðist hafa kyrkt hana og síðan hafi hann sett líkið í ferðatösku. Viku síðar gróf hann líkið.
Hann skýrði frá staðsetningunni þegar hann var yfirheyrður og á fimmtudagskvöldið staðfesti lögreglan að hún hefði, með aðstoð slökkviliðsmanna, fundið líkið.
Grunur beindist að manninum þegar lögreglan gerði ítarlega rannsókn á heimili hans og fann ákveðnar vísbendingar í bílskúrnum. Í framhaldi af því fannst fatnaður af Mine O., persónuskilríki hennar og farsími. Lögreglan vann því út frá þeirri kenningu að maðurinn hefði geymt líkið í bílskúrnum þar til hann fór með það út í skóg og gróf það.
Þegar hann tilkynnti um hvarf eiginkonunnar sagði hann að hún hefði gist hjá vinkonu sinni helgina sem hún hvarf. Hún hafi haft sig til eins og venjulega og tekið farsíma, peninga og lykla með þegar hún fór að heiman. Hann sagðist hafa fyllst áhyggjum þegar hún var ekki komin heim á mánudeginum en hún hafi átt að fara með fimm ára son þeirra í leikskóla þann dag.
