Lausasölulyf eru dýrust í Lyfjum og heilsu samkvæmt nýrri verðkönnun DV á þrettán algengum lausasölulyfjum. Ellefu af þeim þrettán sem DV kannaði voru dýrust í Lyfjum og heilsu. Öll þrettán lyfin voru ódýrust í vöruhúsinu Costco. Vert er að taka fram að viðskiptavinir Costco þurfa að greiða ársgjald í versluninni til að geta verslað þar.
Verðkönnun DV var framkvæmd þann 23. nóvember síðastliðinn og voru heimsóttar fimm stórar keðjur sem selja lyf; Costco, Lyf og heilsa, Lyfjaval, Lyfjaver og Lyfja. um 35% verðmunur er á körfu sem inniheldur öll þrettán lausasölulyfin. Ódýrasta karfan var á rúmlega 25 þúsund krónur í Costco, sú dýrasta á tæplega 34 þúsund krónur í Lyfjum og heilsu.
Mestur verðmunur var á verkjastillandi og hitalækkandi lyfinu Panodil Hot. Það er 87% ódýrara í Costco en í apótekinu þar sem það er dýrast, Lyfjum og heilsu. Í Costco kosta tíu skammtar, eða 500 milligrömm, tæplega 850 krónur en í Lyfjum og heilsu er sama magn á 1.588 krónur.
Ofnæmislyfið Loritin er dýrast í Lyfjavali. Þar eru hundrað 10 milligramma töflur á 2.690 krónur. Í Costco, þar sem verðið er lægst er sama magn á 1.484 krónur. Það jafngildir 81% verðmun á hæsta og lægsta verði. Loritin var eina lyfið af þessum þrettán sem var dýrast í Lyfjavali.
Kveflyfið Strepsils með hunangi og sítrónu var dýrast í Lyfju á 2.199 krónur, einni krónu dýrara en í Lyfjum og heilsu. Sama lyf kostaði 1.600 krónur í Costco, var um 37% ódýrara. Einnig var talsverður verðmunur á slímlosandi lyfinu Otrivin Menthol. Það kostaði 1.218 krónur í Lyfjum og heilsu en 868 krónur í Costco. Það er 40% verðmunur.
Ef litið er til níkótínlyfja er Costco með hagstæðasta verðið. Þar kosta 204 stykki af 2 milligramma Nicotinell Fruit rúmlega 3.500 krónur, en tæplega 4.700 krónur í Lyfjum og heilsu. Tveir úðaskammtarar af Nicorette QuickMist eru einnig ódýrastir í Costco á tæplega 6.800 krónur. Sama magn er á tæplega 8.600 krónur í Lyfjum og heilsu.
Þá var 31–36% verðmunur á algengu verkjalyfjunum Treo, Paratabs og Íbúfen. Sextíu stykki af Treo voru á rúmlega 1.700 krónur í Costco en rúmar 2.300 krónur í Lyfjum og heilsu. Paratabs, þrjátíu stykki af 500 milligramma töflum, var ódýrast í Costco á 380 krónur en dýrast á 498 krónur í Lyfjum og heilsu. Þá var Íbúfen, fimmtíu stykki af 400 milligramma töflum, á rúmar 700 krónur í Costco en tæpar þúsund krónur í Lyfjum og heilsu.
Heildarniðurstöður verðkönnunar DV má sjá hér fyrir neðan: