Nina Burchardt, sem er félagi í sænska jafnaðarmannaflokknum, var ekki velkomin í flokknum eftir að upp komst að hún ætti í ástarsambandi við Johnny Skalin sem er í flokki Svíþjóðardemókrata. Nina var formaður menningarnefndar Hudiksvall sveitarfélagsins en lét af því embætti í september. Þá var sú skýring gefin að það væri til að gefa nýju fólki færi á að láta að sér kveða. En í nýlegri Facebookfærslu skýrir hún frá hinni réttu ástæðu.

„Fimmtudaginn 26. september hringdi formaður verkamannasambandsins í mig klukkan 22 til að tilkynna mér að stjórnin hefði fyrr um kvöldið samþykkt að hvetja mig til að segja af mér öllum pólitískum embættum og hætta í flokknum. Ég er meðlimur í stjórninni, sem tók þessa ákvörðun, og var ég beðin um að mæta ekki á fundinn því ræða ætti um mig og einkalíf mitt.“

Þessi ákvörðun stjórnarinnar var á annan veg en Nina upplifði þegar hún sagði flokksystkinum sínum frá ástarsambandi sínu við Svíþjóðardemókratann Johnny Skalin í ágúst.

„Í ágúst sagði ég svæðisformanninum að ég hefði fundið ástina. Hann faðmaði mig og sagði það ekkert vandamál að ég væri ástfangin af Svíþjóðardemókrata.“