Stærstu bandarísku fyrirtækin hafa grætt svo mikið að þau vita varla hvað þau eiga að gera við alla peningana. Af þeim sökum safnast gríðarlega mikið fjármagn upp hjá þeim og það veldur gremju hjá mörgum fjárfestum.

Microsoft situr á mestu eignunum samkvæmt frétt CNBC en fyrirtækið er með 136,6 milljarða dollara í lausafé og skammtímafjárfestingum. Þar á eftir kemur Bershire Hathaway fjárfestingafélag Warren Buffett með 128 milljarða dollar. Alphabet og Apple fylgja þar á eftir með rúmlega 100 milljarða dollara hvort fyrirtæki.

Að öllu jöfnu myndu fyrirtækin nota peningana til að kaupa önnur fyrirtæki eða til að greiða hluthöfum sínum arð. En það hafa þau ekki gert og eru ýmsar ástæður sagðar liggja að baki.

Christopher Eberle, greinandi hjá Nomura, sagði í samtali við CNBC að hann telji líklegt að fyrirtæki hafi í hyggju að kaupa önnur fyrirtæki en bíði eftir rétta tækifærinu. Verið sé að bíða eftir að toppi uppsveiflunnar sé náð og þegar leiðin liggi niður á við hefjist fyrirtækin handa við að kaupa.