Í Invercargill á Nýja-Sjálandi er veitingastaður sem heitir The Hong Kong Restaurant og er hann kínverskur eins og nafnið gefur til kynna. Nýlega komst upp að veitingastaðurinn hafði notað gæludýrafóður, framleitt úr kjúklingaleggjum, í að minnsta kosti tvo vinsæla rétti. Á umbúðum gæludýrafóðursins kom skýrt og greinilega fram að það væri ekki ætlað til manneldis.

Otago Daily Times skýrir frá þessu. Lisa Wang, eigandi veitingastaðarins staðfesti þetta í samtali við blaðið. Hún sagði að dýrafóðrið hafi verið notað í rétti eftir að kínverskir viðskiptavinir báðu um það. Hún sagði að starfsfólkið hafi einnig notað fóðrið í eigin mat. Hún sagði að um hefðbundinn kínverskan rétt væri að ræða og viðskiptavinir hafi viljað fá hann með gæludýrafóðrinu saman við.

Heilbrigðisyfirvöld hafa málið nú til rannsóknar en óvíst er hvort veitingastaðnum verði refsað fyrir tiltækið.

Lisa Wang segir að nú verði hætt að selja þá rétti sem innihalda gæludýrafóðrið.