Ég reyni oftast að byrja vikuna á fiski, en þessar fiskirúllettur slá alltaf í gegn á heimilinu. Það verður uppi fótur og fit þegar ég bý þetta til og allir mæta í mat – tengdadæturnar setja sig í stellingar og það er slegist um fiskirúlletturnar.
Hráefni:
1 kg af ýsu/þorski, soðinn og kældur áður en rúllettugerðin hefst
150 g rjómaostur
2 tsk. bleikt salt
1/2 tsk. svartur pipar
1/4 tsk. múskat eða 1 tsk. karrý
Raspur
2 hlutar sesamfræ á móti 1 hluta sesammjöli
það gefur extra gott bragð að nota næringarger í raspinn líka og þá myndi ég nota 1/4 hluta á móti hinu
Aðferð:
Fisk, rjómaosti, salti, pipar og múskati skellt í hrærivél og hrært í mótanlegt deig. Rúlletturnar mótaðar út deiginu og þeim velt upp úr raspinu. Steikt á pönnu með góðri slummu af smjöri og bragðlausri kókosolíu þar til rúlletturnar verða fallega gylltar.
Þetta ber ég svo fram með góðu ketómeðlæti, eins og til dæmis smjörsteiktu blómkáli og hrásalati. Þetta er einmitt gömul uppskrift frá mömmu sem var í miklu uppáhaldi hjá mér sem barni – þess vegna ákvað ég að gera hana ketóvæna. Ekta mánudagsmatur, ekki satt?
