Dagur B. Eggertsson borgarstjóri þáði þrjá svokallaða Artist Gold VIP boðsmiða á tónlistarhátíðina Secret Solstice sem haldin var í Laugardalnum í júní, að verðmæti um 450 þúsund krónur. Þetta kemur fram í frétt á vef Hringbrautar. Dagur hefur ekki skráð gjöfina í hagsmunaskráningu borgarfulltrúa en samkvæmt reglum um skráningu á fjárhagslegum hagsmunum borgarfulltrúa ber þeim að gefa upplýsingar um gefanda ef þeir þiggja gjafir fyrir meira en 50 þúsund krónur. Þess má geta að Reykjavíkurborg styrkti Secret Solstice um 8 milljónir króna.
Skúli Helgason, borgarfulltrúi Samfylkingarinnar, þáði miða að andvirði 60 þúsund krónur.
Öllum borgarfulltrúum stóð til boða að fá boðsmiða fyrir einn á hátíðina til að þeir gætu fylgst með hátíðinni og uppfyllt eftirlitsskyldu sína. Fram kemur í viðtali Hringbrautar við framkvæmdastjóra hátíðarinnar að þeir borgarfulltrúar sem þess óskuðu hafi fengið fleiri miða. Miðar á hátíðina voru misdýrir og þeir dýrustu afar verðmætir eins og sjá má í tilfelli borgarstjórans.
Uppfært
Þess skal getið að í þeim aðgangi Dagur borgarstjóri fékk að Secret Solstice er vanalega innifalinn matur og drykkur. Slíkt var þó ekki innifalið í aðgangi Dags og samkvæmt heimildum nýtti hann sér ekki veitingar á svæðinu. Aðgangur hans er þó að sama svæði og þeir sem keyptu 150 000 króna miða fengu aðgang að. Samkvæmt spjalli við einn aðstandenda hátíðarinnar eru flestir gestir á þessu svæði þarna í boði hátíðarinnar. Síðan bætast við Óðinn kúnnar sem hafa líka aðgang að veitingum.