Hlaðvarpsþátturinn, 90 mínútur heldur áfram á fullu fjöri en um er að ræða þátt sem Hörður Snævar Jónsson, ritstjóri 433.is stýrir.
Þátturinn hefur notið mikilla vinsælda en afar áhugaverðir gestir hafa komið í þáttinn.
Gestur þáttarins að þessu sinni er Kári Árnason, sem hefur átt magnaðan feril í atvinnumennsku, hann er nú mættur heim eftir 15 ára feril erlendis. Kári lék í Svíþjóð, Danmörku, Englandi, Skotlandi, Kýpur og Tyrklandi á ferlinum.
Kári tjáði sig aðeins um tíma sinn hjá Rotherham á Englandi en hann lék með liðinu frá 2012 til 2015.
Þar gekk ýmislegt á en undir stjórn Steve Evans komst Rotherham úr D-deildinni upp í Championship með Kára innanborðs.
Aðstaðan í Rotherham var hins vegar hrikaleg þegar Kári mætti fyrst og væri ekki boðleg hjá flestum liðum í Evrópu.
,,Þetta er bara kartöflugarður, þetta er alveg ótrúlegt. Maður heldur að Íslendingar hafi það slæmt en þetta er bara tipp topp hér miðað við það sem gerist hjá old school klúbbum á Englandi,“ sagði Kári.
,,Þetta voru gámar sem var búið að setja sturtuaðstöðu í. Klóakið frá stjóranum tengdist í sturtuna hjá okkur og hann meig alltaf í vaskinn. Hlandið lak inn í sturtuna hjá okkur og þornaði yfir nótt.“
,,Þegar við mættum um morguninn var bara þornuð hlandlykt. Þetta var geggjaður tími og þetta hentar kannski ekki þeim strákum sem við fengum í láni frá stórliðum eins og Liverpool, Chelsea og Manchester United. Þetta hentaði þeim svo sannarlega ekki.“
