„Ég kann líka sögu af því hvernig samfélag við erum búin að búa til hérna við Íslendingar. Sonur minn er með röskun, kvíða og athyglisbrest. Það tók 15 mánuði að koma honum í það að hann fengi greiningu. Þegar hann var búinn að fá greiningu eftir 15 mánuði, þá er sagt við okkur, heyrðu það er annað hvort að kaupa sálfræðitíma fyrir 13 -14 þúsund krónur en síðan getur hann komist á námskeið sem heitir Kátir krakkar og það er 12 mánaða biðtími í það. Ef þið viljið getið þið komist á þetta námskeið í næstu viku. Það kostar 90 þúsund og það er hjá einkaaðilum!“

Þetta segir Máni Pétursson annar umsjónarmaður Harmageddon í þættinum Framapot á RÚV sem sýndur er í kvöld. Þar var sjónum beint sérstaklega að heilbrigðisgeiranum. Máni fjallar einnig um málið á Facebook-síðu sinni og kveðst oft verða „ógeðslega reiður“ þegar talið berst að heilbrigðiskerfinu. Þegar honum og konu hans var tjáð hversu langar biðlistinn væri og það kostaði tæplega 100 þúsund krónur að fá pláss á námskeiði, horfðu þau á hvort annað og hugsuðu bæði:

„Við gátum alveg borgað 90 þús og við gátum líka borgað sálfræði tíma fyrir drenginn. En að við getum borgað og eigum góða að sem leiðbeindu og hjálpuðu okkur eiga það ekki allir. Staðreyndin er sú að barnið okkar á meiri séns en sumir jafnaldrar hans út af fjárhag okkar.“ Þetta er samfélagið sem við erum búin að skapa. Til hamingju Ísland.“

Þá greinir Máni frá því í þættinum að hann hafi kynnst fjölda drengja sem hafi barið mann og annan hér og þar í borginni.

„Þeir hefðu ekki gert það hefðu þeir fengið einhverja hjálp strax í upphafi. Það er eins og menn skilji þetta ekki, eins og þeir geri sér ekki grein fyrir því að eftir 20 ár þá verður einn þarna á biðlistanum að berja barnið þeirra á Arnarneshæðinni.“

Máni segir svo á Facebook:

„Þetta er samfélagið sem við erum búin að skapa. Til hamingju Ísland.“