Gylfi Þór Sigurðsson var flottur í kvöld fyrir íslenska landsliðið sem mætti Tyrkjum í undankeppni EM.

Við ræddum við Gylfa eftir sigur kvöldsins en Ísland hafði betur 2-1 gegn sterkum andstæðingi sem vann heimsmeistara Frakka um helgina.

,,Við höfum spilað mjög vel í þeim keppnisleikjum sem hafa skipt okkur máli fyrir utan heimsmeistaramótið,“ sagði Gylfi.

,,Við vorum bara í erfiðum riðli, hlutirnir gengu ekki alveg upp. Í undankeppnunum fyrir HM þá vorum við frábærir og höfum verið mjög góðir í þessari undankeppni.“

,,Við höfum gert það sem við þurftum. Það er frábært að vera með níu stig eftir fjóra leiki og að vera búnir með Frakkana úti.“

,,Leikplanið í dag gekk fullkomlega upp. Það er frábært að skora tvö mörk snemma í leiknum en mjög svekkjandi að fá á okkur mark úr horni.“

,,Jón Daði var geggjaður í þessum leik. Hann hefur ekki spilað mjög lengi svo það kom mér á óvart hversu vel hann spilaði.“

,,Fyrir mig persónulega er mjög þægilegt að spila með honum. Hann fær gul spjöld á hina leikmennina, fær innköst og aukaspyrnur. Hann ógnar alltaf fyrir aftan hafsentana og gefur okkur tíma til að koma með liðið upp.“

Nánar er rætt við Gylfa hér.