Ágúst Gylfason, þjálfari Breiðabliks, var ánægður með sína menn í kvöld eftir frábæran sigur á Íslandsmeisturum Vals.

Ágúst og félagar sóttu þrjú stig á Origo-völlinn en Andri Rafn Yeoman skoraði eina mark leiksins í sigrinum.

,,Vinnuframlag leikmanna skilaði sigrinum. Ég verð að segja það að við komum með mikið sjálfstraust inn í þennan leik og þrýstum á Valsarana,“ sagði Ágúst við Stöð 2 Sport.

,,Við fengum 2-3 góð færi í fyrri hálfleik og vorum óheppnir að hafa ekki skorað. Við héldum upptekknum hætti í seinni hálfleik og héldum góðri pressu.“

,,Við unnum návígin og klárum þetta með flottu marki. Þetta voru geggjuð þrjú stig á erfiðum útivelli og sigurinn var fyllilega sanngjarn.“

,,Mér fannst alltaf eins og þetta myndi enda í markinu, Valsarar sköpuðu sér ekki mikið. Ég er gríðarlega sáttur með þrjú mikilvæg stig.“

,,Við erum ekkert að hugsa um Val fyrir neðan okkur, við eltum bara Skagamenn.“