Síðastliðin mánudag tilkynntu öryggisverðir Bode-safnsins í Berlín lögreglu um að gríðarstór gullmynt, sem skartar ásjónu Elísabetu Bretadrottningar, væri horfin. Myntin, sem gengur undir nafninu „Stóra hlynslaufið“ (e. Big Maple Leaf) og er á stærð við bíldekk, hafði verið fjarlægð af standinum, sem hún hvílir venjulega á, um miðja nótt. Hafði þjófunum tekist að komast framhjá öryggiskerfi safnsins. Þá fannst stigi í grennd við nærliggjandi lestarstöð sem er talinn tengjast innbrotinu.

Samkvæmt frétt Bloomberg um málið er myntin metin á um 450 milljónir króna. Hún var gefin út af Hinni konunglegu kanadísku myntsláttu árið 2007 og var þá stærsta gullmynt í heimi. Aðeins voru slegin fimm eintök af myntinni.