Magnús Smári Smárason, Formaður Landssambands Slökkviliðs- og sjúkrafluttningamanna, skrifaði í morgun pistil í Fréttablaðið. Þar lýsir hann áhyggjum sínum á því að íslenskir slökkviliðs- og sjúkrafluttningamenn þurfi að vinna til 67 ára aldurs til að fá fullan lífeyri, 7 árum lengur en starfsbræður þeirra í Noregi og Danmörku.

Magnús nefnir margar mismunandi ástæður fyrir því að ekki sé gott fyrir starfsstéttina að vinna of lengi. Fyrst nefnir hann að slökkviliðs- og sjúkrafluttningamenn sinni verkefnum sem taki bæði verulega á líkama og sál, þeir þurfi að vera viðbúnir að bregðast við neyð allan sólarhringinn.

Hann bendir líka á að rannsóknir sýni fram á tengsl á milli slökkviliðsstarfsins og ákveðinna krabbameina. Á vegum landssambandsins, þar sem Magnús er formaður, starfar sérstök krabbameinsnefnd sem fræðir félagsmenn og fylgist með gangi mála í rannsóknum á krabbameini.

En það eru ekki bara líkamleg veikindi sem Magnús bendir á heldur segir hann slökkviliðs- og sjúkrafluttningamenn líklegri til að greinast með áfallastreituröskun.

Magnús talar um erfiðar líkamlegar kröfur slökkviliðsmanna og nefnir sem dæmi reykköfun „Þeir þurfa að uppfylla heilbrigðiskröfur sem settar eru í reglugerð um reykköfun en þar er enginn munur gerður á kröfum milli kyns eða aldurs. Með hækkandi aldri getur einstaklingum reynst erfiðara að uppfylla þessar kröfur.“

„Oft á tíðum þarf að lyfta sjúklingum úr erfiðum aðstæðum þar sem ómögulegt getur verið að beita réttri líkamsstöðu með tilheyrandi hættu á stoðkerfisáverkum,“ segir Magnús til að sína enn betur fram á líkamlega erfiðleika sem slökkviliðsmenn þurfa að glíma við, en hann segir heilsufarsvandamálin aukast verulega með aldrinum.

„Sjaldgæft er að slökkviliðs- eða sjúkraflutningamenn klári starfsævina í vaktavinnu,“ bendir Magnús á og segir að málin séu gjarnan leyst með starfslokasamningum eða með því að færa fólk í starfi, en sumir þurfa hins vegar bara að hætta af heilsufarslegum ástæðum.

Magnús vill að lífeyristökualdur slökkviliðsmanna verði sá sami og í Noregi og Danmörku og spyr hvar niðurstöður starfshóps um snemmtöku lífeyris fyrir erfið og hættuleg störf en þær áttu að berast fyrir árslok 2017.