Þerna á gistiheimili í Passau í Þýskalandi gerði á laugardaginn hræðilega uppgötvun. Þegar hún ætlaði að þrífa eitt herbergið á gistiheimilinu fann hún þrjú mannslík. Örvar úr lásboga sátu fastar í öllum líkunum.

Í herberginu voru einnig tveir lásbogar. Fórnarlömbin eru öll þýskir ríkisborgarar, 53 ára karlmaður og tvær konur, 30 og 33 ára.

Lögreglan veit ekki enn hvort fólkið þekktist eða hvað gerðist í herberginu sem varð til þess að fólkið lést. Þá er ekki ljóst hvort fólkið lést af völdum örvanna eða af öðrum orsökum. Lögreglan segir þó að ekkert bendi til að aðrir en hin látnu hafi verið í herberginu.

Nú er beðið eftir niðurstöðu krufningar í þeirri von að hún varpi ljósi á hvað gerðist á bak við luktar dyr herbergisins.