„Ef djöfullinn sjálfur afhenti mér í eigin persónu skjöl sem sýndu fram á spillingu í himnaríki, þá myndi ég birta þau. Það er skylda blaðamannsins,“ segir Kristinn Hrafnsson í viðtali við þýska tímaritið Der Spiegel. Kristinn tók við af Julian Assange, stofnanda Wikileaks, sem aðallritstjóri WikiLeaks, í september á síðasta ári. Í löngu viðtali við Kristinn sem birtist í Spiegel í dag er farið nokkuð vítt yfir sviðið. Eðlilega er mikið rætt um Julian Assange en einnig um stöðu Kristins, sem segist lengi hafa verið undir smásjánni hjá bandarísku leyniþjónustunni og fleiri bandarískum stofnunum, rétt eins og aðrir starfsmenn WikiLeaks.

Julian Assange var fyrir skömmu dæmdur í 50 vikna fangelsi í Bretlandi fyrir brot á skilmálum tryggingar sem hann var látinn laus úr gæsluvarðhaldi gegn áður. Er Assange átti að mæta fyrir dómara í júní árið 2012 flýði hann inn í sendiráð Ekvador í London og var veitt pólitískt hæli af ríkisstjórn landsins. Assange hafði haldið til sendiráðinu í næstum því sjö ár er Ekvador svipti hann hælinu og breskir lögreglumenn ruddust inn í sendiráðið og handtóku hann þann 11. apríl síðastliðinn. Er nú réttað yfir Assange í Englandi vegna framsalsbeiðnar Bandaríkjastjórnar. Vilja bandarísk yfirvöld hafa hendur í hári Assange vegna leynilegra uppýsinga sem samtökin fengu frá Chelsea Manning (sem þá hét Bradley Manning) árið 2010 og birtu.

Assange er nú haldið í öryggisfangelsi og spyr Spiegel Kristinn hvort hann óttist að hljóta sömu örlög. Kristinn segir: „Þar sem „WikiLeaks hefur verið undir hörðum árásum í tíu ár er ég meðvitað um þá hættu sem þessu starfi fylgir. Það er ljóst að ég er í skotlínu Bandaríkjastjórnar, bandaríska hersins og leyniþjónustunnar. Frá árinu 2014 hefur okkur verið ljóst að ekki bara Assange heldur líka aðrir úr WikiLeaks-hópnum eru rannsakaðir.“

Kristinn er spurður út í ástand Assange eftir veruna í sendiráðinu og meintan sóðaskap hans þar. Kristinn segir að hann telji Assange hafa sýnt ótrúlegan styrk og gefur í skyn að frásagnir um laklegt framferði hans séu áróður. Bendir Kristinn á að enginn geti litið vel út í öryggsimyndavélum allan sólarhringinn.

Viðtalið (á þýsku) má lesa hér.