Svo virðist vera sem allt sé á suðupunkti vegna kyrrsetningar Isavia á flugvél sem WOW air leigði af bandaríska fyrirtækinu Air Lease Corporation (ACL). Greint er frá því á forsíðu Fréttablaðsins í dag að dulbúnum hótunum hafi verið beitt af hálfu forsvarsmanna ACL.

Isavia kyrrsetti vélina um það leyti sem WOW fór í gjaldþrot vegna vangoldinna gjalda. ACL hefur reynt að fá kyrrsetningunni hnekkt en án árangurs og ber fyrir sig að enginn grundvöllur sé fyrir henni. Vélin sé í eigu þriðja aðila og ACL beri enga ábyrgð á umræddri skuld. Ljóst má vera að miklir hagsmunir eru í húfi.

Eigandi og stofnandi ACL heitir Steven F. Udvar-Házy en hann er milljarðamæringur og nokkuð valdamikill ef marka má frétt Fréttablaðsins. Er hann þannig sagður hafa sterk tengsl sem ná til ráðherra í ríkisstjórn Donalds Trumps Bandaríkjaforseta.

Í fréttinni er gefið til kynna að fyrirtækið gæti beint spjótum sínum að stjórnendum Isavia persónulega en áhrifin gætu einnig náð til íslenskra flugfélaga og annarra fyrirtækja sem selja ferðir til Bandaríkjanna.

Þá segir í fréttinni að sendiherra Bandaríkjanna hér á landi hafi átt vegna málsins en málið mun þó ekki vera komið á borð utanríkisráðuneytisins.