Penny Ivey Thompson, íbúi í Flowood í Mississippi í Bandaríkjunum, fór með Dodge-bifreið sína í þjónustuskoðun á verkstæði í bænum fyrir skemmstu.

Þetta væri vart í frásögur færandi ef ekki væri fyrir Facebook-færslu sem fór sem eldur í sinu um netheima og óheiðarlegan starfsmann verkstæðisins sem stendur eftir atvinnulaus.

Skömmu eftir að Penny hafði skutlað bílnum á verkstæði rak hún upp stór augu þegar hún sá Dodge-bifreiðina sína á ferð um bæinn. Hún birti mynd af atvikinu á Facebook og var ekki beint ánægð þegar hún sá þar sem bifreiðinni var ekið niður Lakeland Drive, eina fjölförnustu götu bæjarins, mjög þétt fyrir aftan aðra bifreið. „Enginn keyrir Stóru-Berthu svona. Enginn,“ sagði hún í færslunni en Penny kallar bílinn sinn „Big Bertha“.

Þar með er ekki öll sagan sögð því hún elti ökumann bifreiðarinnar að bílastæði verslunar í bænum. „Ég elti hann því ég vildi vera viss um að bílinn kæmist til baka í heilu lagi,“ segir hún en fyrir utan verslunina beið hún í tuttugu mínútur eftir ökumanninum, sem reyndist vera bifvélavirki á verkstæðinu.

Þegar hann hafði ekki skilað sér ákvað hún að stela eigin bifreið, ef svo má segja, með því að nota varalykilinn. Hún ók sem leið lá að verkstæðinu og talaði við yfirmann þar. Sá bauðst til að biðja hana afsökunar ef hún skrifaði ekki um málið á Facebook. Það dugði skammt en eftir að færsla Penny fór í dreifingu tilkynnti umræddur yfirmaður að bifvélavirkinn hefði verið rekinn.

Penny virðist vera mjög umhugað um bílinn sinn því hún skrifaði í færslu sinni: „Þú abbast ekki upp á fjölskylduna mína, dýrin mín, peningana mína eða bílinn minn.“