Eins og DV skýrði frá í ársbyrjun þá lék grunur á að Robinson hefði flúið hingað til lands enda hafði hann keypt sér flugmiða frá Chicago til Keflavíkur í byrjun ágúst á síðasta ári. Ekki var þó hægt að staðfesta að hann hefði notað miðann og komið hingað til lands.
ABC News skýrði frá því í gærkvöldi að nú hafi Robinson verið handtekinn og sé kominn í fangelsi í Boone County. Samkvæmt upplýsingum bandarískra fjölmiðla var hann handtekinn í Chicago en ekki fengust nánari upplýsingar um málavexti eða hvort hann hefði farið til Íslands á síðasta ári.
Robinson var handtekinn 3. ágúst á síðasta ári en hann var þá grunaður um blygðunarsemisbrot. Hann hafði berað kynfæri sín fyrir fyrir framan fólk og komið faldri myndavél fyrir inni á salerni bókasafns. Auk þess er hann grunaður um nauðgun en frekari upplýsingar um það mál liggja ekki fyrir.
Í janúar var lýst eftir honum en þá töldu saksóknarar að hann hefði flúið land því hann hafði keypt flugmiða til Keflavíkur þann 5. ágúst.
Robinson situr nú í varðhaldi og verður ekki látinn laus gegn greiðslu tryggingar.