Bara 10 mínútur á grilli eða í ofni
Lax er og verður alltaf herramanns matur. Hann er fullur af góðum næringarefnum og vítamínum og hver sem er duglegur að borða lax mun hafa gott af. Þó ekki sé nema bara fyrir allt D-vítamínið sem í honum er.
Fyrir fólk sem vill draga úr kjötneyslu er laxinn líka alveg frábær valkostur á grillið en eins og við Íslendingar vitum er hægt að grilla úti allt árið um kring.
Þessi ljúffengi réttur kemur úr smiðju Guðbjargar Finnsdóttur, íþróttakennara hjá G-Fit í Garðabæ. Hann er mjög fljótlegur og því tilvalinn helgarmatur fyrir upptekið fólk sem langar að fá sér eitthvað gott og heilsusamlegt að borða en nota líka helgina til að slaka svolítið vel á og eyða ekki óþarfa tíma í eldamennsku svona rétt eftir áramótin.
Rétturinn inniheldur jafnframt mangósultu eða Mango Chutney, sem er mikið notað með indverskum mat og gefur skemmtilega sætt en um leið kröftugt bragð.
1 stórt laxaflak
1 krukka af góðu Mango Chutney
Laxinn er settur á álpappír, Mango Chutney er smurt ofan á flakið og látið bíða, eða marinerast, í tvo til þrjá klukkutíma. Síðan er laxastykkið grillað í um tíu mínútur á háum hita eða haft í ofni á 210 gráðum í jafn langan tíma.
5% sýrður rjómi, ein dós
Steinselja
Vorlaukur
Pipar
Saxið steinselju og vorlauk mjög fínt og hrærið út í sýrða rjómann. Kryddið með grófum pipar og látið standa í svolitla stund, gjarna inni í ísskáp.
Með þessum fljótlega og heilsusamlega rétti er gott að bera fram sætar kartöflur í ofni eða brún hýðishrísgrón, fer eftir smekk. Gott og ferskt salat er líka frábært með sem og ískalt kranavatn með sítrónu eða lime.
