Guðjón Pétur Lýðsson gerði samning við lið Breiðablik í dag en hann gerði þriggja ára samning við félagið.

Guðjón var á óskalista bæði Breiðabliks og Vals eftir að hafa rift samningi sínum við KA á Akureyri.

Það er stutt í að Pepsi-Max deildin fari af stað á ný og er Guðjón ánægður með þessa lendingu en hann vildi komast burt frá KA vegna fjölskyldunnar.

,,Ég er ánægður með þessa lendingu og þakklátur Blikunum fyrir að hafa trú á mér og taka við mér svona stuttu fyrir mót,“ sagði Guðjón.

,,Þetta er að stærstum hluta vegna fjölskylduástæðna, ég hef verið einn fyrir norðan að hálfum fæti frá nóvember en fullu frá janúar, fjölskyldan hefur reynt að fá pláss á leikskóla og ég hef verið einn og fjölskyldan var orðin þreytt á að bíða eftir að komast norður.“

,,Það var komið erfitt hljóð í konuna og krakkana, ég bað um það að fá að slíta samstarfinu og KA má eiga það að þeir komu vel fram við mig og það er frábært að komast hingað.“

,,Það eru algerir toppmenn þarna fyrir norðan og það er gott að vera þarna og vonandi get ég komið seinna.“

,,Fyrst og síðast var þetta eitthvað gut feeling, báðir kostirnir voru mjög góðir og ég tók langan tíma í að ákveða þetta.“

,,Síðasti einn og hálfur sólahringur hefur farið í þetta. Ég tók þessa ákvörðun út frá nokkrum hlutum, það eru spennandi tímar hérna.“