Sjálfstæðisflokkurinn mælist með mest fylgi íslenskra flokka í nýjustu könnun MMR á fylgi stjórnmálaflokka. Fylgi Sjálfstæðisflokks mælist nú 26,9% en var 24,4% í síðustu könnun sem lauk 15. febrúar 2017. Vinstri græn mældust með næst mest fylgi eða 23,9%. Það er lækkun um 3,1 prósentustig frá síðustu mælingu. Þó þarf að taka fram að líkt og fylgisbreytingar annarra flokka, eru sveiflurnar á fylgi flokkanna innan vikmarka. Fylgi Framsóknarflokksins jókst um 1,5% milli kannana og mælist fylgið nú 12,2%.

Píratar mælast með 11,6% fylgi, Samfylkingin með 8,0%, Viðreisn með 6,3% og Björt framtíð með 5,2% fylgi. Flokkur fólksins mældist með 2,5% en fylgi annarra flokka mældist undir 1%. Stuðningur við ríkisstjórnina jókst milli kannana og kváðust 37,9% styðja ríkisstjórnina. Það er þriggja prósentustiga hækkun frá síðustu könnun.
Könnunin var gerð dagana 17.–24. febrúar 2017, spurðir voru 928 einstaklingar, 18 ára og eldri.