Veturinn getur verið langur og dimmur og það fer illa í suma, þunglyndi og leiði geta gert vart við sig. En það er ekki allt alveg vonlaust þrátt fyrir það. Það er hægt að ráða bót á þessu.

Að minnsta kosti segja vísindamenn við Iowa State háskólann það. Í fréttatilkynningu frá háskólanum kemur fram að niðurstöður nýrrar rannsóknar sýni að 12 mínútna daglegur göngutúr, þar sem hugsað er jákvætt um annað fólk, sé áhrifarík aðferð til að komast í betra skap.

Vísindamennirnir rannsökuðu nokkrar aðferðir til að kanna hvað gerir okkur glöð. Þátttakendum, allt námsfólki við háskólann, var skipt í fjóra hópa. Hóparnir voru látnir fara í 12 mínútna göngutúra á háskólalóðinni og fékk hver hópur ákveðið umhugsunarefni til að glíma við í göngutúrnum.

Hópur 127 stúdenta átti að hugsa: „Ég óska mér að þessi manneskja sé hamingjusöm“ um þá sem þeir mættu.

Hópur 125 stúdenta átti að hugsa um hvort þeir ættu eitthvað sameiginlegt með þeim sem þeir sáu.

Hópur 109 stúdenta átti að hugsa hvort þeir hefðu það betra en þeir sem þeir sáu.

Síðast var hópur 135 stúdenta sem var svokallaður samanburðarhópur sem átti ekki að hugsa um neitt sérstakt.

Niðurstaðan var að ánægðustu þátttakendurnir voru þeir sem áttu að hugsa jákvætt um annað fólk. Þeir sögðust finna fyrir minni kvíða, voru hamingjusamari og fundu til meiri samkenndar en aðrir þátttakendur.

Vísindamennirnir ráðleggja fólki því að fara daglega í göngutúr og noti hann til að gleðjast fyrir hönd annarra því það auki eigin ánægju og hamingju.