Það getur borgað sig að fara varlega í umferðinni og kannski sérstaklega þegar ekið er um þröngar götur á rándýrum lúxusbílum. Þessu fékk ökumaður í Lundúnum að kynnast á dögunum þegar hann sýndi áhugasömum vegfarendum „listir“ sýnar.

Maðurinn var á Lamborghini-bifreið af tegundinni Huracán Performante þegar hann ákvað að gefa aðeins í. Bifreiðar af þessari gerð eru langt því frá ókeypis, kosta um 250 þúsund pund sem jafngildir um 40 milljónum íslenskra króna.

Eins og sést á meðfylgjandi myndbandi, sem Mail Online birti, missti ökumaðurinn stjórn á bifreiðinni með þeim afleiðingum að hún fór í tré og endaði á vegg. Talsverðar skemmdir urðu á bílnum en sem betur fer slapp ökumaðurinn ómeiddur frá þessum ósköpum. Bifreiðin var óökufær á eftir og var flutt burt með kranabifreið.

Atvikið átti sér stað á HR Owen Supercar-hátíðinni sem haldin var í Acton í gær. Þar koma eigendur lúxusbíla saman og sýna bíla sína.

Þessi bifreið er ein sú hraðskreiðasta í heiminum en hún er aðeins 2,9 sekúndur að komast upp í hundrað kílómetra hraða og 8,9 sekúndur í 200.