„Við höfum sett á laggirnar starfshóp í ráðuneytinu sem er að skilgreina þessi verkefni á helstu þessum leiðum hér út,“ sagði Jón Gunnarsson samgönguráðherra í morgunútvarpi Rásar 2 á mánudag.

Hugmyndir Jóns Gunnarssonar samgönguráðherra um vegatolla hafa verið harðlega gagnrýndar. Þá sérstaklega af fólki sem býr í nágrenni höfuðborgarsvæðisins og starfar í Reykjavík. Þeir sem gagnrýna þessar hugmyndir beita þeim rökum að almenningur sé þegar búinn að greiða skatta af bílum og bensíni og einkabíllinn sé í raun margskattlagður.

Jón Gunnarsson tjáði sig nánar um hugmyndir starfshópsins hjá ráðuneytinu á Rás 2 en hugmyndirnar snúast um að gjald verði tekið á vegum sem liggja frá höfuðborgarsvæðinu. Segir Jón að þeir sem ferðist sjaldan eigi að borga ríflega en hinir sem reglulega fari til og frá Reykjavík greiði minna.

Segir Jón að eins og er sé aðeins um hugmynd að ræða en verkefnið sé aðkallandi þar sem samgöngukerfið sé ekki í góðu ástandi.

„Það er mikil eftirspurn eftir fjármagni, hvort sem það er í heilbrigðiskerfi eða öðru. Menn eru að sýna ábyrgð í ríkisrekstrinum og við þurfum að reka ríkissjóð með afgangi þannig ég er bara að láta skoða þetta til þess að geta lagt þessa valkosti á borðið í umræðunni,“ segir Jón.