Harpa Þórsdóttir mun stýra Listasafni Íslands næstu fimm árin
Harpa Þórsdóttir hefur verið skipuð í embætti safnstjóra Listasafns Íslands til næstu fimm ára frá 1. mars næstkomandi. Þá tekur hún við embættinu af Halldóri Birni Runólfssyni sem hefur gegnt því undanfarinn áratug.
Harpa Þórsdóttir er fædd árið 1972. Að loknu stúdentsprófi nam hún við Sorbonne-háskólann í París og lauk þaðan Maí’trise-prófi í listasögu árið 1998. Hún starfaði við safna- og fornleifafræðideild Bouloqne-sur-Mer borgar og sem verkefnisstjóri í Charente-Maritime héraði til ársins 2002 er hún var ráðin deildarstjóri sýningardeildar Listasafns Íslands. Harpa hefur verið forstöðumaður Hönnunarsafns Íslands síðan haustið 2008. Á liðnu ári lauk hún sérhæfðu námi fyrir stjórnendur safna á vegum Getty Leadership Institute í Claremont Graduate University í Kaliforníu.