Dýraverndunarsamtökin PETA, sem meðal annars berjast gegn framleiðslu á fatnaði sem framleiddur er úr loðdýrum, hafa ákveðið að gefa Fjölskylduhjálp Íslands 200 pelsa að gjöf.

Pelsarnir verða merktir sérstaklega með bleikum lit en tilgangurinn með því er að fólk geti ekki selt þá áfram. „Við viljum ekki að þessir pelsar verði seldir áfram því að þeir einu sem geta mögulega verið í þeim er fólk sem er í mikilli þörf og myndi annars láta lífið í nístingskuldanum úti,“ sagði Sonul Badiani-Hamment, baráttukona hjá PETA, í samtali við RÚV í gær.

Pelsarnir eru sagðir koma frá fólki sem vill ekki nota þá lengur, en fatnaður af þessu tagi er rándýr og geta minkapelsar kostað nokkur hundruð þúsund krónur. Ásgerður Jóna sagði í frétt RÚV að PETA hafi haft samband um mánaðamótin nóvember/desember og boðið henni pelsana. „Og mér fannst þetta mjög frábært og ég er þakklát PETA fyrir að koma og hjálpa okkur að aðstoða aðra.“

Margir hafa tjáð sig um málið á Facebook og virðist fólk skiptast í tvær fylkingar, þótt heldur fleiri gagnrýni þessa ákvörðun PETA og Fjölskylduhjálparinnar. Sumum finnst hugmyndin snilldarleg – þarna sé verið að koma góðum og hlýjum fatnaði til þeirra sem á þurfa að halda og breytir þá engu hvort hann sé merktur sérstaklega. Heldur fleiri benda hins vegar á að þarna sé verið að merkja þá sérstaklega sem eru heimilislausir.

Hér að neðan má sjá brot af umræðunum á Facebook: