„Mér finnst eins og það hafi skipt sköpum fyrir mig að hafa hundinn; önnur lífvera, vinur minn, búinn að eiga hann í sjö ár, gat talað við hann og sinnt honum og hann hélt á mér hita. Hann myndaði ofboðslega mikinn hita.“

Þetta segir Friðrik Rúnar Garðarsson, læknir og rjúpnaskytta, í viðtali sem sýnt verður í Kastljósi í kvöld. Friðrik fannst í gærmorgun eftir að hafa villst á rjúpnaveiðum á Fljótsdalshéraði á föstudag. Hafði hans verið leitað í tæpa tvo sólarhringa. Ljóst er að ekki mátti miklu muna að verr færi enda hafði Friðrik verið utandyra, í kulda og erfiðum aðstæðum, í um 50 klukkustundir.

Í stiklu vegna Kastljóssþáttarins í kvöld segir Friðrik að labrador-hundurinn hans, Moli, hafi létt honum lífið svo um munar. Stikluna má sjá hér að neðan en hún birtist frétt á Facebook-síðu Kastljóss. Í henni má einnig sjá stutt viðtal við kærustu Friðriks Rúnars, Sunnefu Pálsdóttur, sem lýsir því hvernig henni varð við þegar hún fékk fréttirnar af því að Friðrik væri fundinn, heill á húfi.

„Ég hefði ekki meikað aðra nótt,“ segir Friðrik svo í annarri stiklu sem birtist á vef RÚV.is nú síðdegis.