Fagurblár sjór, fagrar sandstrendur og steikjandi hiti. Þetta er eitthvað sem við Íslendingar kunnum vel að meta. Koh Tao uppfyllir þessi skilyrði svo sannarlega ef fólk vill njóta sólar, vatns og hita. En undir fögru yfirborðinu leynast skelfilegar staðreyndir.
Frá 2014 hafa níu evrópskir ferðamenn látist eða horfið á eyjunni auk þess sem ýmis önnur mál hafa komið upp. Í júní beindist kastljós breskra fjölmiðla að eyjunni eftir að 19 ára bresk stúlka kærði nauðgun þegar hún var stödd þar. The New York Times segir að það sem veki einna mesta athygli útlendinga og jafnframt gagnrýni frá þeim sé hvernig lögreglan á eyjunni tekur á afbrotum þar sem ferðamenn eru fórnarlömb.
Hvað varðar nauðgunarmálið þvertekur lögreglan fyrir að hún hafi átt sér stað. Ekki nóg með það því hún hefur handtekið fjölda fólks sem tjáði sig um málið á samfélagsmiðlum. Einnig var gefin út handtökuskipun á hendur ritstjóra vefmiðils á Englandi og stjórnanda Facebookhóps.
Taílenskir lögreglumenn fóru til Englands til að rannsaka málið betur en í síðasta mánuði komust þeir að þeirri niðurstöðu að ekki hefði verið um nauðgun að ræða. Þá fann lögreglan ekki sæði á stuttermabol sem stúlkan hafði afhent henni. South China Morning Post hefur eftir talsmanni taílensku lögreglunnar að þegar atburður sem þessi eigi sér stað á mikilvægum ferðamannastað í Taílandi verði að upplýsa málið og komast að hinu sanna.
Stúlkan sagði í samtali við The Times að hún hefði verið að skemmta sér með vini sínu. Skyndilega fór hana að svima og lognaðist síðan út af á ströndinni. Þegar hún rankaði við sér var vinur hennar horfinn en ókunnugur maður stóð að hennar sögn og horfði á hana áður en hann flýtti sér í burtu. Þá áttaði hún sig á að hún var ekki í nærbuxum og að henni hafði verið nauðgað. Henni var ráðlagt að kæra málið en ákvað þess í stað að fara frá eyjunni. Lögreglan taldi þetta vega þungt í málinu.
Herinn fer með stjórnartaumana í Taílandi og hefur gert síðan 2014. The New York Times segir að yfirvöld séu ekki sérstaklega hrifin af gagnrýni og hafi umdeildar skoðanir á ýmsum málum. Er þar nefnt til sögunnar að embættismenn hafi gefið til kynna að konur sem verða fyrir kynferðisofbeldi eða áreitni eigi sjálfar sök á því með klæðnaði sínum.
2014 ræddi Prayuth Chan-ocha, forsætisráðherra, mál tveggja breskra ferðamanna sem voru myrtir en öðrum þeirra var nauðgað áður.
„Þeir halda að landið okkar sé fagurt og öruggt og að þeir geti gert allt sem þeir vilja – klætt sig eins og þeim sýnist. Ég spyr mig: Ef kona klæðist bikiní í Taílandi, er hún þá örugg? Bara ef hún er ekki falleg.“
Hann baðst þó afsökunar á þessum orðum sínum síðar.