Svo virðist sem heimurinn hafi orðið kaupóður síðustu helgi á hinum árlega Degi einhleypra, eða Singles Day, á vefverslunum AliBaba og AliExpress. Greint er frá því á vef BBC að kínverska fyrirtækið hafi sett nýtt sölumet síðasta sunnudag, og selt fyrir 1 milljarð Bandaríkjadala, eða 123 milljarða íslenskra króna á fyrstu 85 sekúndunum eftir að opnað var á tilboðin.

Dagur einhleypra er alls ekki gömul hefð en hann var búinn til af AliBaba árið 2009 sem einskonar mótvægi við Valentínusardaginn. Fyrirtæki víða um heim, þar á meðal á Íslandi, taka nú þátt í Degi einhleypra og bjóða upp á tilboð á netinu.

Það er erfitt að ná utan um sölutölurnar. Tölurnar sem um ræðir eru það háar að hætt er að telja þær í milljörðum og eru þær komnar upp í billjarða, seldi AliBaba alls fyrir 3,7 billjarða íslenskra króna eða 3.690 milljarða. Til samanburðar nam landsframleiðsla Íslands fyrir árið 2017 alls 2.550 milljörðum króna.

Fyrir þá sem misstu af tilboðum á Degi einhleypra þá er ekki að örvænta, þann 23. nóvember er Svartur fössari, eða Black Friday, á mánudeginum 26.nóvember verður svo Cyber Monday. Verða mörg íslensk fyrirtæki einnig með afslætti í tengslum við þá daga.