Donald Trump Bandaríkjaforseti neitaði að svara hvort hann hefði á einhverjum tímapunkti átt samtal við Kim Jong-Un einræðisherra Norður-Kóreu. Bandaríkin og Norður-Kórea hafa átt í erfiðu sambandi síðustu misseri og var á tímabili útlit fyrir hugsanlegt kjarnorkustríð milli landanna tveggja. Þó að kjarnorkuhættan virðist vera liðin hjá, að minnsta kosti tímabundið, hafa leiðtogar landanna haldið áfram að senda hvor öðrum pillur. Nú síðast sagði Kim Jong-Un að hann væri með fingurinn á kjarnorkuvopnatakkanum, Trump svaraði með því að segja að sinn takki væri stærri.
Trump var spurður að því í viðtali við Wall Street Journal hvort hann hefði einhvern tímann talað við Kim Jong-Un: „Ég vil ekki ræða það. Ég segi ekki hvort ég hef gert það eða ekki. Ég vil ekki ræða það,“ sagði Trump í viðtalinu. Hann upplýsti hins vegar um að allt sem hann geri hvað varðar samskiptin við Norður-Kóreu sé úthugsað: „ Þú getur tekið eftir því hjá mér. Stundum er ég besti vinur einhvers, ég er mjög sveiganlegur.“
Varðandi friðarviðræður Norður- og Suður-Kóreu í tengslum við Vetrarólympíuleikana sagði Trump þær vera til þess fallnar til að skilja Suður-Kóreu frá Bandaríkjunum: „Ég myndi gera það í þeirra sporum. Munurinn er sá að ég er forsetinn og aðrir ekki. Ég veit meira hvernig á að stía aðilum í sundur en nokkur annar sem hefur lifað,“ sagði Trump.
Norður-Kórea hefur fengið jákvæð viðbrögð fyrir viðleitni þeirra til að opna á samskipti við nágranna sína í suðri. Vladimír Pútín Rússlandsforseti sagði í blaðaviðtali í vikunni að Kim hefði „unnið þessa lotu“ og kallaði hann einræðisherrann „lævísan og þroskaðan leiðtoga“. „Hann er með kjarnorkuvopn, hann er með flugskeyti með 13 þúsund kílómetra drægni, sem nær nánast um alla jörðina. Nú er hann með áhuga á að minnka spennuna. Hann er orðinn lævís og þroskaður leiðtogi,“ sagði Pútín.
