Bretar ætla að styrkja getu sína til nethernaðar og tölvuárása og varna gegn þeim með því að stofna nýjan her tölvusérfræðinga. Um 2.000 manns verða í þessum nýja her. Tilefnið er vaxandi ógn sem er talin stafa af Rússum í netheimum en rússnesk stjórnvöld standa á bak við umfangsmikla starfsemi tölvuþrjóta á netinu.

Sky skýrir frá þessu. Fram kemur að með þessari nýju herdeild fjórfaldist fjöldinn sem tekst á við nethernað fyrir Breta, bæði varnir og árásir. Auk hersins mun leyniþjónustan GCHQ koma að málinu. Sky segir að fljótlega verði tilkynnt um stofnun hersins.

Sky hefur eftir Sir Richard Barrons, fyrrum yfirmanni breska hersins, að það sé mikilvægt að styrkja getu Breta til að gera tölvuárásir á tímum sem þessum þar sem ríki á borð við Rússland séu þegar í sókn. Með þessu jafni Bretar stöðuna á þessu sviði og geti nú varist tölvuhernaði og gert árásir í hefndarskyni.