„Það er löngu kominn tími til að þjóðir heims vakni og átti sig á því að stefnan sem fylgt hefur verið á þessu sviði er bara eins konar helstefna með glæpum og mannfórnum sem unnt er að draga úr svo um munar.“

Þetta segir Jón Steinar Gunnlaugsson, lögmaður og fyrrverandi hæstaréttardómari, í pistli sem birtist á vef Pressunnar á fimmtudag. Pistillinn hefur vakið mikla athygli en í honum telur hann upp atriði sem mæla með lögleiðingu fíkniefna og segir margs konar böl fylgja opinberri bannstefnu gegn efnunum.

Jón Steinar segir gríðarlegan fjölda fólks hafa látið lífið í stríðinu við fíkniefnadjöfulinn, þar á meðal fólk sem ekki hafi verið sjálfviljugir þáttakendur. Margs konar böl af öðru tagi fylgi bannstefnunni, lífi sé haldið í undirheimunum þar sem glæpir þrífast og löggæslan ræður lítið við.

„Ungmenni sem leiðast út í neyslu verða fórnarlömb glæpamanna. Þau fjármagna neysluna með glæpum og vændi. Efnin sem dreift er geta verið stórhættuleg meðal annars vegna þess að stundum er reynt að drýgja þau með íblöndun annarra efna. Og árangurinn af þessari skelfilegu stefnu er auðvitað enginn. Efnin flæða yfir á Vesturlöndum sem aldrei fyrr og yfirvöldin ráða ekkert við vandann,“ segir hann.