Á miðvikudaginn náði grunaður hryðjuverkamaður að flýja á ótrúlegan hátt úr Vestre Fængsel í Kaupmannahöfn. Málið er hið vandræðalegasta fyrir fangelsismálayfirvöld en maðurinn beið eftir að vera framseldur til Ítalíu en þar bíður hans ákæra vegna aðildar að hryðjuverkastarfsemi.

Hann sat í gæsluvarðhaldi í fangelsinu. Hann fékk heimsókn og skiptu hann og gesturinn um fatnað og skilríki og síðan gekk gæsluvarðhaldsfanginn út úr fangelsinu. Upp komst um þetta skömmu síðar en of seint. Fanginn var á bak og burt og ekkert hefur til hans spurst síðan. Lögreglan gerði umfangsmikla leit að honum og lokaði meðal annars aðaljárnbrautarstöðinn í Kaupmannahöfn fyrir allri umferð í tvær klukkustundir á miðvikudagskvöldið.

Strokufanginn er 46 ára Sýrlendingur sem hefur verið búsettur í Svíþjóð.