„Það er allskonar ógeð þarna á milli.“ Þetta segir Kristrún Heiða Hauksdóttir sem er búin að eyða Youtube af öllum snjalltækjum heimilisins í þeim tilgangi að koma í veg fyrir að börnin hennar horfi á óæskilegt efni á síðunni.

„Þetta er náttúrlega svo svakalega stór veita af efni og frumskógur. Alveg eins og í frumskóginum þá er margt fallegt en það er líka margt stórhættulegt,“ sagði Kristrún Heiða í samtali við Morgunútvarpið á Rás 2 í morgun. Kristrún skrifaði grein um málið á Nútímann í gær sem vakti mikla athygli.

Kristrún Heiða segir að á Youtube sé sömuleiðis mikið af auglýsingaefni sem er sérstaklega beint að börnum, en það er bannað á Íslandi.

„Síðan er þarna leikið látbragðsefni sem er ekki á neinu sérstöku tungumáli. Það er algjör djöflasýra.“

Kristrún Heiða segir það sömuleiðis óþægilegt að maður veit aldrei hvert myndböndin leiða þig. „Þú getur horft endalaust og veist í raun og veru aldrei fyrirfram hvert myndbandið leiðir þig.“

Hún segir jafnframt í viðtalinu að framleiðsla þessara myndbanda, sem börnin sækja i, snúist að lokum ávallt um peninga.

„Þegar maður dýfir tánni ofan í þennan heim þá verður maður bara afskaplega hræddur um börnin sín. Þetta er rosalega bein markaðssókn, að mörgu leyti, og svo algjör klikkun, umfjöllunarefnið sjálft í þessum myndböndum er rosalega súrt og jaðrar við klám.“