Eldri íslensk kona, Ásgerður nokkur, biðst innilega afsökunar á því að hafa móðgað fólk í einum stærsta Facebook-hóp Íslands, Skemmtileg íslensk orð. Innlegg hennar hefur vakið mikla athygli en á þriðjudagsmorgni hafa nærri hundrað manns skrifað athugasemd við færslu hennar.

„Ég er miður mín og þykir leitt að hafa sært fólk með skrifum mínum ég setti hér inn orð sem ég man eftir frá æsku minni og vissi ekki að það væri svona sóðalegt ég mun draga mig í hlé hér á þessari síðu,“ skrifar Ásgerður. Færslunni þar sem hún spurði um þetta dónalega orð hefur verið eytt, en orðið sem hún spurði um var „pervert“ og varð hún fyrir nokkru aðkasti í þeim þræði fyrir að vita ekki hvað það orð þýddi.

Langflestir lýsa yfir stuðningi við Ásgerði í nýja þræðinum og segja henni að hlusta ekki á eineltisraddir. „Bíddu hvað var það þá? Alls ekki fara að láta fólk hafa þessi áhrif á þig. Við erum hér að ræða allskonar orð. Eðli þeirra er ekki eitthvað sem á að ráðast á persónu fyrir,“ segir ein kona. Einn karlmaður tekur undir og skrifar: „Alls ekki gera það Ásgerður. Þetta tökuorð er alveg hægt að ræða um eins og öll önnur orð. Er í rauninni búið að vinna sér nokkuð fastan sess í málinu og notað af mörgum. Alls ekki taka þetta nærri þér.“

Önnur kona segir henni að pervert sé ekkert verra orð en margt annað. „Alls ekki gera það Ásgerður. Þetta tökuorð er alveg hægt að ræða um eins og öll önnur orð. Er í rauninni búið að vinna sér nokkuð fastan sess í málinu og notað af mörgum. Alls ekki taka þetta nærri þér,“ skrifar sú kona.

Flestir eru þó á því máli að þeir sem gagnrýndu Ásgerði sé hinir raunverulegu skúrkar. „Fór fólk í alvöru að væla yfir þessu orði?? EKKI taka það nærri þér! Þetta eru bara vælupúkar þú gerðir ekkert rangt!,“ skrifar ein kona og karlmaður tekur undir og segir: „Óttarlegt væl og viðkvæmni er þetta“

Sæmundur nokkur lýsir yfir stuðningi við Ásgerði og skrifar: „Svertingjar voru alltaf kallaðir negrar, og við þetta ólst ég upp, Ég kalla svertingja negra enn í dag og fæ á mig allskins óþverra. Merking þessa lýsingarorðs hefur víst breyst svo mikið en ég hef ekki fylgt þeirri breytingu og nota orðið negri enn í dag yfir svart fólk, verð samt að viðurkenna að ég hef smávegis dregið úr því. og nota það meira svona til að stuða fólk.“