Bíl af gerðinni Toyota Corolla, með skráningarnúmerið YY492, var stolið við farfuglaheimilið í Laugardal þann 6. maí síðastliðinn. Fyrrum eiginmaður eiganda bílsins sem ekki vill láta nafn síns getið sendi DV myndband sem hann telur sýna meintan þjóf. Sjáðu myndbandið hér að neðan.
Maðurinn sem hafði samband við DV vegna málsins segir lögregluna ekki hafa sýnt því neinn áhuga og bendir á að ekki hafi verið lýst eftir bílnum. Rúmir tveir mánuðir eru síðan bíllinn hvarf. „Ég er búinn að hringja oft í þann sem er að rannsaka málið en það er ekkert í gangi og greinilega enginn áhugi á að gera eitt né neitt,“ segir hann í samtali við DV.
Hann segir bílleysið koma illa niður á fyrrverandi konu sinni. „Þetta er búið að vera bagalegt fyrir hana þar sem hún er einstæð með tvær stelpur 4 og 8 ára sem þarf að koma í skólann,“ segir hann og biðlar til þeirra sem vita hvar bíllinn er niður kominn að hafa samband við lögreglu.
