Sviss 1-1 Brasilía
0-1 Philippe Coutinho(20′)
1-1 Steven Zuber(50′)

Lokaleikur dagsins á HM í Rússlandi var að klárast en þar áttust við lið Brasilíu og Sviss.

Um var að ræða stórleik en Brasilía er í öðru sæti heimslista FIFA á meðan Sviss situr í sjötta sætinu.

Það voru Brasilíumenn sem skoruðu eina mark fyrri hálfleiks en það gerði miðjumaðurinn Philippe Coutinho.

Coutinho átti frábært skot fyrir utan teig sem hann sneri í fjærhornið og átti Yann Sommer ekki möguleika í markinu.

Sviss jafnaði svo metin eftir hornspyrnu snemma í síðari hálfleik en Steven Zuber stangaði þá knöttinn í netið.

Það var lítið um opin marktækifæri í leiknum en Brassar ógnuðu mikið undir lokin en þeim tókst ekki að bæta við.