Yfirvöld í Rússlandi er byrjuð að herða reglur sínar fyrir Heimsmeistaramótið í Rússlandi í sumar. Sérstaklega þegar kemur að áfengisnotkun. Independent segir frá.

Yfirvöld óttast læti í kringum leiki á HM og hafa yfirvöld í Moskvu ákveðið að taka harðast á málum.

Þannig hafa verið settar reglur í Moskvu sem banna alla sölu á áfengi degi fyrir og sama dag og leikur fer fram í borginni.

Þarna er um að ræða alla skemmtistaði, knæpur, veitingastaði, matvöruverslanir og áfengisverslanir. Hins vegar verður möguleiki á að versla bjór á sérstökum FIFA svæðum sem verða í borginni og eru opin á leikdögum.

Ísland á einmitt fyrsta leik sinn á Heimsmeistaramótinu í Moskvu, þar mætir liðið Argentínu þann 16. júní.

Búast má við um og yfir 5 þúsund Íslendingum sem munu ekki geta fengið sér í glas degi fyrir og á leikdag. Mögulega verður þó hægt að fara í kringum reglurnar með því að redda sér kippu eða fleyg í tíma, fyrir þá sem vilja.