Elliði Vignisson, bæjarstjóri Sjálfstæðisflokksins í Vestmannaeyjum, nær ekki kjöri í bæjarstjórn samkvæmt nýrri könnun Fréttablaðsins, ef kosið yrði nú. Sjálfstæðisflokkurinn fengi rúm 41% og þrjá menn kjörna, meðan Fyrir Heimaey, klofningsframboð úr Sjálfstæðisflokknum, , fengi tæp 32% og tvo menn kjörna. Eyjalistinn, sameinað framboð fólks úr Framsókn, Samfylkingu Vinstri grænum og óflokksbundnum, fengi rúm 25% og tvo menn einnig.
Elliði er í 5. sæti lista Sjálfstæðismanna og er bæjarstjóraefni flokksins. Hann segist við Fréttablaðið ekki búast við að verða kjörinn bæjarfulltrúi:
„Í aðdraganda frágangs listans komu fram vangaveltur um lýðræðishalla, um að sami einstaklingur sé í forsæti og bæjarstjóraefni og jafnframt með langmestu reynsluna.“
Þá segir hann við Fréttablaðið að flokkurinn stefni á að fá fjóra menn kjörna.
Samkvæmt Fréttablaðinu var könnunin var gerð þannig að hringt var í 778 manns með lögheimili í Vestmannaeyjum þar til náðist í 604 samkvæmt lagskiptu úrtaki 23. apríl. Svarhlutfallið var 77,6 prósent. Þátttakendur voru valdir með slembiúrtaki úr þjóð skrá. Svarendur skiptust jafnt eftir kyni, og hlutfallslega eftir aldri. Alls tóku 53,5 prósent þeirra sem náðist í afstöðu til spurningarinnar. Þá voru 9,4 prósent sem sögðust ekki ætla að kjósa eða ætla að skila auðu, 13,5 prósent sögðust óákveðin og 23,6 prósent vildu ekki svara spurningunni.
