Arsenal tók á móti West Ham í ensku úrvalsdeildinni í dag en leiknum lauk með 4-1 sigri heimamanna.

Nacho Monreal kom Arsenal yfir í upphafi síðari hálfleiks en Marko Arnautovic jafnaði metin fyrir West Ham, nokkrum mínútum síðar.

Aaron Ramsey kom Arsenal svo í 2-1 áður en Alexandre Lacazette bætti við tveimur mörkum til viðbótar og lokatölur því 4-1 fyrir Arsenal.

Arsene Wenger, stjóri Arsenal var ánægður með að taka þrjú stig í leiknum eftir erfiða byrjun.

„Við ætluðum okkur að vinna þennan leik en atburðir vikunnar settu vissulega strik í reikninginn. Ég er ánægður að ná að klára þetta þrátt fyrir erfiða byrjun,“ sagði stjórinn.

„Þetta var góður undirbúningur fyrir fimmtudaginn, við þurfum að klára undanúrsitin til þess að komast í úrslitin en Evrópudeildin er keppni sem við viljum að sjálfsögðu vinna.“

„Ég vil annars nota þetta tækifæri og þakka fyrir mig og þakka þeim sem hafa hrósað mér of mikið á undanförnum dögum. Þetta hefur verið frábær kafli í mínu lífi og ég er mjög þakklátur fyrir það,“ sagði Wenger að lokum.