Héraðsdómur Reykjavíkur hefur dæmt Jón Valdimar Jóhannsson í tíu mánaða skilorðsbundið fangelsi. Jón var um tíma eftirlýstur af Interpol árið 2016 en hann var ákærður fyrir stórfellda líkamsárás á skemmtistaðnum Spot í Kópavogi árið 2014.

Jón var ákærður fyrir að hafa hrint manni með báðum höndum þannig að hann féll í gólfið. Afleiðingarnar urðu þær að fórnarlambið hlaut lífshættulega og alvarlega höfuðáverka, þar með talið heilamar í yfirborði ennisblaða og gagnaugablaða, yfirborðsáverka á litla heila vinstra megin, byrjandi blóðsöfnun undir heilahimnu á gagnauga hægra megin, blóð að framan vinstra megin og blæðingu milli heilahólfa framan til, innkýlt brot í hnakkablaðinu hægra megin og loft inni við bein rétt framan við Pétursbeinið, sem leiddi til heilaskaða, meðal annars með varanlegri heyrnarskerðingu á hægra eyra, tapi á lyktar- og bragðskyni, hægari hugsun, gloppóttu minni, kvíða og þunglyndi, auk skerðingar á andlegu og líkamlegu þoli og úthaldi.

Dómur í málinu féll upphaflega í október 2016 og var maðurinn þá sakfelldur. Dóminum var áfrýjað til Hæstaréttar sem ómerkti hann í nóvember í fyrra og vísaði honum aftur heim í hérað.

Jón hefur frá upphafi neitað sök í málinu en dómurinn taldi þó sannað að Jón hefði verið sá maður sem veittist að brotaþola með fyrrgreindum afleiðingum. Var það talið sannað með hliðsjón af framburði fjögurra vitna. Vegna þess dráttar sem varð á meðferð málsins hjá ákæruvaldinu  var ákveðið að skilorðsbinda refsinguna.